சாமி நீயே வரங்கொடடி

என்ன எந்தன் கண்மணியே
ஏதும் இல்லை நிம்மதியே
வாழும் வழி ஏதுமுண்டோ
வார்த்தை ஒன்று சொல் கிளியே

சாதுவாக நானிருந்து
சாதித்தது எதுவுமில்லை
மாது உந்தன் துணையிருந்தால்
மன்னவனாய் நானிருப்பேன்

மாமிமகள் நீயெனக்கு
மந்திரியாய் வாய்த்துவிட்டால்
பூமியை நான் ஏய்த்திடுவேன்
புகழ் பலவும் சேர்த்திடுவேன்

கோயில் குளம் சென்றுகூட
சாமியை நான் கண்டதில்லை
பூமி போலப் பொறுத்திருக்கும்
பொறுமை எனக்கில்லையடி

தேவி நீதான் தெய்வம் என்று
தினந்தினம் நான் தேடிவந்தேன்
சாதிக்க வேணுமென்று
சாமி நீயே வரங்கொடடி